संघीय मामिला तथा सामान्य प्रशासन मन्त्रालयले मनलाग्दी ढंगबाट कर्मचारी चलाउँदा गृह प्रशासनमा ठूलो संख्यामा कर्मचारी रिक्त हुन पुगेको छ ।
बिज्ञापन
निर्वाचनको मुखमा गृह प्रशासन र मातहतका जिल्ला प्रशासन कार्यालय,अध्यागमन विभाग,इलाका प्रशासन लगायतका निकायमा झण्डै २४३ कर्मचारी रिक्त हुन पुगेको जनाइएको छ ।
बिज्ञापन
गृह मन्त्रालय स्रोतका अनुसार राजपत्र अनकिंत १८१ र अधिकृतस्तरका मात्र ६२ कर्मचारीको दरबन्दी रिक्त रहेको जनाइएको छ । जसमा खरिदार तहका ९५,नासु ८६ र अधिकृत तहका ६२ दरबन्दी रिक्त अवस्थामा रहेको छ ।
निर्वाचनकै मुखमा पटक पटक गरी कर्मचारीहरु चलाइँदा झण्डै साढे दुई सय कर्मचारी रिक्त हुन पुगेको गृह मन्त्रालयले जनाएको छ । गृहले फागुन २१ को निर्वाचन मुखमा कर्मचारीहरु नचलाउन पटक पटक पत्राचार गरे पनि संघीय मामिला तथा सामान्य प्रशासन मन्त्रालयले अटेरी गर्दै आएको छ ।
संगठन तथा व्यवस्थापन सर्भेअनुसार देशभर गृह र मातहतका निकायमा कार्यालय सहयोगीदेखि सचिवसम्म ४ हजार ५ सय भन्दा बढी दरबन्दी रहेकोमा झण्डै साढे दुई सय कर्मचारी रिक्त रहेको जनाइएको छ ।
बिज्ञापन
निर्वाचनको मुखमा गृह मन्त्रालय र मातहतका निकाय कर्मचारी अभाव भोग्नुपर्ने स्थिति आएको गृहका कर्मचारीहरु बताउँछन् । कर्मचारी नचलाइन दिन र कर्मचारी अभाव पूरा गर्न गृहले संघीय मामिला तथा सामान्य प्रशासन मन्त्रालयलाई पटकपटक ध्यानाकर्षण गराइसकेको भए पनि संघीय मामिला तथा सामान्य प्रशासनबाट सुनुवाई नभएको गृहका अधिकारीहरु बताउँछन् ।
तर सो मन्त्रालयका कर्मचारी प्रशासन महाशाखा सम्हालिरहेका कालीप्रसाद पराजुलीले भने,सामान्य प्रशासनसँग कुराकानी हुँदा छिट्टै कर्मचारी पठाइने वचनवद्धता व्यक्त भएको प्रतिक्रिया दिएका छन् ।
